Neposluško Prostotić, mesopust
I ovoga leta, došlo je vrime pusneh tanci, najluje godišnje doba ko postoji va našen kraju! Doba karnevala i maškar ke vladaju po sakud pa tako i va našen vrtiću. Saki petak, iz našeg vrtića šire se dihi slastic….kroštule, palačinke, frite… Betmeni, princeze, leptiri, patuljci, lavi, dohtori i drugi liki uživaju u spravljanju raznih jela u pauzi od danci pod maskami.
Ne bi maškare bile maškare da nan se ni upisal va vrtić mesopust! Sako leto, nekoliko tjedni, mesopust provede z nami. Dok sedi i pazi na ulaz va naš vrtić, smišljamo mu razna djela za ka je kriv. Saki se dan pojavi neš novo! Ovega leta dečica su zibrala ime za mesopusta Neposluško Prostotić, krivac za sa nedela i zla ča su se dogodila pasano leto.
Naš krivac osuđen je jer je tužakal drugu decu, čupal vlasi i rival se, ni delil slatkiši i igračke, zimal je igračke i hital ih, pljuval je decu, govoril grde besedi, budil je drugu decu, plazil jezik, ni pospravljal, hitil je šalicu va poneštru, zrezal Hani crtež, pisal po stolu, pravil se važan i pametan,ni jil broskvu, ni slušal tete!
Naši su Pačići tako odlučili storit mesopusta od starih žurnali. Obukli su mu i stare gaći i maju, a dečica iz skupine Zvjezdice storila su mu glavu i nabadala mu kosu. Saki petak plešemo z našin Neposluškom Prostotićem, a na pusni utorak reć ćemo mu se za ča mu zameramo, malo ćemo broštulat, oganj naložit i neka čim prije se pozabe se grde stvari i nećemo ih se spominjat!
GALERIJA:
